👉NASA मध्ये किती प्रकारच्या नोकऱ्या असतात? निवड कशी होते? पगार किती मिळतो? जाणून घ्या...

 👉NASA मध्ये किती प्रकारच्या नोकऱ्या असतात? निवड कशी होते? पगार किती मिळतो? जाणून घ्या...

अंतराळ विज्ञानात रस असलेल्या विद्यार्थ्याचे नासामध्ये काम करण्याचे स्वप्न असते.

JOB OPPORTUNITIES IN NASA : भारतीय वंशाचे अंतराळवीर सुभांशू शुक्ला यांनी आज आपल्या NASA तील टीमसह अंतराळात उड्डाण केले. गेल्या अनेक दिवसांपासून त्यांच्या उड्डाणाबद्दल सर्वत्र चर्चा सुरू होती. दरम्यान, आता नासाबद्दल लोकांमध्ये उत्सुकता वाढली आहे. अंतराळ विज्ञानात रस असलेले विद्यार्थी तर नासामध्ये काम करण्याचे स्वप्न पाहतात. परंतु येथे काम मिळवणे सोपे नाही, यासाठी खूप कठोर मेहनत आणि चांगले ज्ञान असणे आवश्यक आहे. 

अनेकांना असे वाटते की, नासामध्ये फक्त अंतराळवीरांनाच नोकरी मिळते, पण असे नाही. नासामध्ये विविध विभागांमध्ये अनेक नोकऱ्या आहेत. शास्त्रज्ञ, अभियंता, तंत्रज्ञ, प्रशासक आणि इतर अनेक पदवांर काम असते. 

👉नासामध्ये कोणत्या पदांसाठी नोकऱ्या उपलब्ध आहेत?

नासामधील नोकऱ्या USAJOBS.gov वर सूचीबद्ध आहेत. हे अमेरिकन सरकारचे अधिकृत जॉब पोर्टल आहे. येथे उमेदवार त्यांचा बायोडाटा सबमिट करू शकतात आणि नोकरीसाठी अर्ज करू शकतात. शास्त्रज्ञ, अभियंता, तंत्रज्ञ, प्रशासकीय भूमिका, संगणक शास्त्रज्ञ, डेटा सायंटिस्ट, सॉफ्टवेअर अभियंता, अंतराळवीर, व्यवस्थापन, मानव संसाधन इत्यादी नोकऱ्यांसाठी अर्ज मागवले जातात.

तांत्रिक पदांवरील बहुतांश नोकऱ्यांसाठी, विज्ञान, तंत्रज्ञान, अभियांत्रिकी आणि गणित (STEM) क्षेत्रातील पदवी किंवा पीएचडी पदवी असणे आवश्यक आहे. जर उमेदवाराकडे आधीच इंटर्नशिप, संशोधन प्रकल्प किंवा तांत्रिक प्रशिक्षणाचे प्रमाणपत्र असेल, तर येथे नोकरी मिळवणे सोपे होईल.

नासामध्ये खगोलशास्त्रज्ञ, ग्रहशास्त्रज्ञ, हवामान शास्त्रज्ञ, जीवशास्त्रज्ञ, भौतिकशास्त्रज्ञांचीही भरती केली जाते. 

याशिवाय, अंतराळ मोहिमांमध्ये सहभागी होणारे प्रशिक्षित पायलट, मिशन विशेषज्ञ, पेलोड विशेषज्ञ, सायबर सुरक्षा विशेषज्ञ, प्रकल्प व्यवस्थापक, आर्थिक विश्लेषक, लॉजिस्टिक्स विशेषज्ञ, सोशल मीडिया व्यवस्थापक, मिशन नियंत्रण कर्मचारी, सुरक्षा विशेषज्ञ, रोबोटिक्स विशेषज्ञ, आंतरराष्ट्रीय अंतराळ कायदे आणि धोरणांवर काम करणारे कायदेशीर तज्ञ इत्यादी पदांवर नोकऱ्या उपलब्ध आहेत.

👉नासामध्ये नोकरीसाठी अर्ज कसा करावा?

नासामध्ये नोकरी शोधण्यासाठी किंवा अर्ज करण्यासाठी उमेदवारांना USAJOBS नावाच्या सरकारी वेबसाइटला भेट द्यावी लागेल. जर नासामध्ये कोणतीही रिक्त जागा असेल, तर ती या वेबसाइटवर तपासता येईल. 

जर तुम्हाला अर्ज करायचा असेल तर प्रथम तुम्हाला USAJOBS वेबसाइटवर खाते तयार करावे लागेल. प्रोफाइल तयार केल्यानंतर, तुम्हाला तुमचा रिज्युम अपलोड करावा लागेल. उमेदवार या वेबसाइटवर पाच वेगवेगळ्या प्रकारचे रिज्युम अपलोड करू शकतात.

रिज्युम अपलोड केल्यानंतर, हायरिंग पाथ्स विभागात जा. जर नासाने नोकरीसाठी अर्ज मागवले असतील, तर ते येथे दिसतील. तुम्हाला तुमच्या आवडीची नोकरी सापडल्यावर, त्याची माहिती काळजीपूर्वक वाचा. जर तुम्ही पात्र असाल, तर "अर्ज करा" या बटणावर क्लिक करा आणि तुमचा बायोडाटा जोडा. यानंतर उमेदवारांना फॉर्म भरावा लागेल. 

👉नासाच्या अंतराळवीरांचा पगार किती आहे?

नासाच्या वेबसाइटनुसार, येथे अंतराळवीराचा पगार दरवर्षी $१५२,२५८.०० पर्यंत आहे. पगाराव्यतिरिक्त, अंतराळवीरांना इतर सुविधा देखील दिल्या जातात. याशिवाय, जर एखादा अंतराळवीर अंतराळ मोहिमेवर गेला आणि तेथे जास्त दिवस घालवला, तर त्याला त्यासाठी वेगळे पैसे देखील दिले जातात.

उदाहरणार्थ, बुच विल्मोर आणि सुनिता विल्यम्स सारख्या नासाच्या अंतराळवीरांना देखील इतर सरकारी कर्मचाऱ्यांइतकेच पगार मिळतो. ते दर आठवड्याला ४० तास काम करतात. गेल्या वर्षी नासाने म्हटले होते की, अंतराळवीरांना दरवर्षी $१५२,००० (सुमारे १.२६ कोटी रुपये) पेक्षा जास्त मिळतात. 

अंतराळवीर जेव्हा अंतराळात असतात तेव्हा त्यांना नियमित पगार मिळत राहतो. त्यांच्या प्रवासाचा, राहण्याचा आणि जेवणाचा खर्च सरकार उचलते. याशिवाय, अंतराळवीरांना दररोज छोट्या खर्चासाठी पैसे देखील मिळतात.