👉कढीपत्त्याची चटणी...

बाजारात आपण भाजी खरेदी करण्यासाठी गेलो की सगळ्यात शेवटी कढीपत्ता अगदी आवर्जून घेतोच. कारण कुठलीही भाजी असो किंवा डाळ, आमटी असो फोडणीसाठी जिरे, मोहरीसोबत कढीपत्ता हा लागतोच. 

पण बऱ्याचदा लहान मुलेच काय मोठी माणसेदेखील भाजीतील, डाळ-आमटीमधील कढीपत्ता ताटात बाजूला काढून ठेवतात. त्यामुळे पदार्थाला कढीपत्त्याचा स्वाद येत असला तरी प्रत्यक्षात तो पोटात जात नाही. 

त्यामुळे या कढीपत्त्याची जर चटणी केली तर ती सगळेच आवडीने खातील. कारण ही चटणी अतिशय चविष्ट लागते.

👉कढीपत्ता चटणीसाठी आवश्यक साहित्य :

१) २ वाट्या कढीपत्ता पाने

२) २ टेबलस्पून चणाडाळ 

३) २ टेबलस्पून उडीद डाळ 

४) २ टेबलस्पून शेंगदाणे

५) १ टीस्पून जीरे

६) ७-८ लसूण पाकळ्या

७) ३ टेबलस्पून सुके खोबरे

८) २ टेबलस्पून तेल 

९) १ टेबलस्पून लाल तिखट

१०) १ टीस्पून धणे पावडर

११) १ छोटा तुकडा चिंच/ (१/२ टीस्पून आमचूर पावडर )

१२) १ छोटा गुळाचा खडा

 १३) चवीपुरते मीठ.

👉कृती :

कढीपत्त्याची पाने स्वच्छ धुवून सुती कापडाने पुसावीत. पानांमध्ये अजिबात पाणी राहता कामा नये. ती पूर्ण कोरडी करावीत.

गॅसवर कढई गरम करुन त्यात सुके खोबरे किंचित सोनेरी रंगावर खरपूस भाजून ताटात काढावे. त्यानंतर त्याच कढईत १ टेबलस्पून तेल घ्यावे. तेल थोडे तापले की त्यात चणाडाळ मंद आचेवर सतत ढवळत खरपूस भाजावी. फार करपवू नये, त्यावर हलके डाग येईपर्यंत भाजावी. चणाडाळ भाजल्यावर ताटात काढावी आणि त्याच कढईत उडीद डाळही त्यावर हलके डाग येईपर्यंत भाजावी.

आता कढईत पुन्हा १ टेबलस्पून तेल गरम करावे आणि त्यात शेंगदाणे थोडे काळे डाग पडेपर्यंत भाजावे व ताटात काढावे. त्यानंतर लसूण आणि जिरे १-२ मिनिटे खमंग भाजावे.

सगळ्यात शेवटी कढीपत्त्याची पाने ती छान कुरकुरीत होईपर्यंत भाजावीत.

हे सगळे साहित्य थंड झाल्यावर मिक्सरच्या भांड्यात काढून त्यात लाल तिखट, धणे पावडर, आवडत असेल तर अगदी छोटा गुळाचा खडा, चटपटीत चवीसाठी चिंच (याऐवजी आमचूर पावडर किंवा चाट मसाला वापरला तरी चालतो.), चवीनुसार मीठ घालावे आणि चटणी थोडी रवाळ वाटावी.

चटणी मिक्सर मधून वाटल्यानंतर थोडा वेळ एका पसरट भांड्यात पसरवून ठेवावी आणि त्यानंतर हवाबंद बरणीत स्टोअर करावी. ही चटणी २ ते ३ महिने टिकते.

कढीपत्ता हा अतिशय गुणकारी असतो. कढीपत्त्यामध्ये असणाऱ्या असंख्य गुणधर्मामुळे केस, त्वचा, पोटाचे विकार यांसारख्या अनेक समस्यांवर कढीपत्ता उपयुक्त ठरतो.

➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖➖